Hitt bananabrauðið

Fyrr á árinu setti ég inn uppskrift að bananabrauði sem ég baka mjög oft. Í þessari færslu er svo uppskrift að bananabrauði sem ég geri sjaldnar. Það má segja að þetta sé hálfgert sparibrauð því það er aðeins meira maus við þetta brauð og svo er það líka sætara en hitt. Í dag var það bakað í tilefni af verslunarmannahelginni og í von um að hægt verði að narta í gæðabrauð úti á palli um helgina.

Þessa uppskrift tók ég uppúr Skíðablaðinu sem gefið er út fyrir vestan um hverja páska. Ég held að þetta hafi verið í blaðinu fyrir tveimur árum og þar heitir það Banana- og engiferbrauð.

275 g spelti (ég blanda grófu og fínu eða læt fínt spelti og íslenskt byggmjöl)

2 tsk vínsteinslyftiduft

1 msk fersk engifer, saxað smátt

3 tsk engiferduft

1 tsk kanill

0,5 tsk múskat

0,25 tsk negull

80 g hrásykur (ég set aldrei nema helminginn af þessu)

2 egg

4 mjög vel þroskaðir bananar

1 tsk vanilludropar

1 msk kókosolía (eða önnur góð olía)

115 g rúsínur

Aðferð

• Sigtið saman í stóra skál spelti, vínsteinslyftiduft, engiferduftið, kanil, negul og múskat. Hrærið mjög vel.
• Afhýðið engiferið og saxið (eða rífið) mjög smátt. Þið þurfið eina matskeið af engiferi. Setjið útí stóru skálina og hrærið vel.
• Afhýðið bananana og stappið vel. Setjið í aðra skál ásamt vanilludropum, hrásykri, olíu og eggjum. Hrærið mjög vel.
• Hellið bananablöndunni út í stóru skálina og veltið deiginu aðeins til. Ekki hræra mikið því þá verður brauðið seigt.
• Bætið rúsínum út í deigið og veltið því varlega.
• Deigið á að vera frekar blautt (á að leka af sleifinni í stórum klessum) og ef það er of þurrt bætið þá svolitlu vatni, mjólk eða appelsínusafa út í.
• Klæðið brauðformið með bökunarpappír (eða notið yndislega sílikonformið) og hellið deiginu út í. Gætið þess að fari vel í hornin.
• Bakið við 180°C í 45-50 mín. Stingið í brauðið og þegar prjónninn kemur þurr úr brauðinu er það tilbúið.
• Kælið brauðið aðeins og skerið í sneiðar.
• Gott með osti og smjöri.

Óveðursbakstur

Í dag, 4. mars 2013, er óveður víða á landinu og þurfti ég að fresta skóla vegna þess. Að venju kallaði óveðrið og inniveran á bakstur svo ég hræðri í bananabrauð. Þessi uppskrift er sett saman úr nokkrum uppskriftum sem ég safnaði einhvern tímann saman af netinu og fannst engin þeirra nógu góð. Svo úr varð þessi og hún bregst aldrei. Í hana þarf 3-4 vel þroskaða banana. Stundum er meira að segja hægt að fá poka með nokkrum ofþroskuðum bönunum í Bónus á innan við 100 kr.

2 dl fínt speltmjöl

2 dl gróft speltmjöl (öðrum þeirra má skipta út fyrir íslenskt byggmjöl)

2-3 tsk vínsteinslyftiduft

1 dl sólblómafræ

3-4 þroskaðir bananar

2 egg

2 msk olía eða kókosolía

1 lúka haframjöl og önnur til að strá yfir brauðið

1 msk sítrónusafi

Stappið bananana og blandið eggjunum saman við. Blandið svo restinni af innihaldinu saman við. Speltbrauð á helst ekki að hræra mikið. Deigið er frekar blautt. Þetta passar í eitt stórt kökuform. Er bakað í 45-50 mínútur við 200°C á undir og yfirhita neðarlega í ofni.

Best volgt með osti og smjöri.